شمس بكرة

الحل النهائي لعلاج تساقط الشعر من الصيدلية

By 5/31/2017

السلام عليكم يا بنات موضوع مهم جدا لكل بنت عايزة تحل مشكلة تساقط شعرها

كل المعلومات اللي هقولها هتفيدكم حتي لو روحتي لدكتور ع الأقل يبقي عندك فكرة ايه المفروض يحصل وايه المناسب لحالتك غير شوية النصائح اللي هقولها في آخر الموضوع 👍

شعري بيقع أعمل ايه ؟؟

أول حاجة هتبدأي تسمعي أغنية رحت وسبت فراغ كبير

وتظبطي نفسيتك علي انك مش لوحدك ف كوكب الأرض دي مشكلة جيل ورا جيل وتعرفي ان شعرك مش هيزرع ويطرح محصول من يوم وليله أقل مدة نتايجها بتظهر من 3 ل 6 شهور ف نصيحتي ليكي ف الفترة دي ... اهدي يا منار
تاني حاجة لازم تلتزمي بكل حاجة هكتبها يعني مينفعش تاخدي كبسولات وتسيبي الشامبو أو تجيبي سيروم من غير ما تاخدي فيتامينات لازم كله يكون مع بعضه عشان تطلعي بنتيجة مظبوطة
تالت حاجة هتكلم عن ميزانية عامله من 300 ل 500 ج واكتر وهقول الرخيص والغالي وطبعا الغالي بيوفر وقت وبيدي نتايج مطلوبة

نبدأ بقا بسم الله الرحمن الرحيم 👇

1 - تحللي أنيميا .. بصي بقا سواء طلع عندك أنيميا يا حبيبة قلبي أو لا هتاخدي كبسولات حديد وزنك الا لو عايزة تعملي تحليل الحديد والزنك ده بيبقي تحليل خاص غير الهيموجلوبين هيطلعلك نسبتهم في جسمك وعادة هتبقي منخفضة فمن رأيي انك توفري تمن التحاليل لانك هتدفعي أضعافهم ف العلاج

2 - معاكي فلوس كتير ما شاء الله

هتبدأي تاخدي مع كورس العلاج ميزوثيرابي عبارة عن مجموعة فيتامينات بتتحقن ف فروة الراس حقنة كل اسبوع الاول وبعدين حقنة كل اسبوعين وبعدين كل شهر طول فترة العلاج وبعدها وده بيدي نتايج جامدة جدا طبعا .. وممكن تدخلي معاه حقن البلازما هتبقي نتايجه حلوة أوي

3 - ميزانيتك متوسطة تسمح انك تجيبي امبولات للشعر يبقي حلو أوي سيادتك هتجيبي أمبولات شعر اكرينال Ecrinal أو اناستيم Anastim عبارة عن 8 امبولات هتكسري الامبول ممكن تستخدمي نصه علي فروة شعرك مش لازم كل الامبول بتدلكي الفروة لمدة 5 دقايق وأحسن وقت تكون المسام فيه مفتوحة بعد ما تغسلي شعرك .. استخدميه 3 مرات كل اسبوع ف اول شهر من العلاج ده كفيل انه يوقفلك تساقط الشعر بصورة ملحوظة جدا من أول اسبوعين

4 - ميزانيتك متوسطة تسمح انك تجيبي حقن بيوتين + بيبانثين Biotine + Bepanthene

موجودة ف العزبي كل علبة فيها 6 امبولات كل مرة هتاخدي أمبول من هنا وأمبول من هنا وتفضيهم في سرنجة وتاخديهم عضل 3 حقن أو حقنتين ف الاسبوع نتايجها ممتازة طبعا مع كورس العلاج ومش للتساقط بس كمان بتحسن من طبيعة الشعر

الكورس اللي هتمشي عليه من 3 ل 6 شهور كحد أقصي

في الجلدية عشان نضمن أفضل النتايج بندي علاج موضعي local يعني يأثر علي الجزء اللي بيتاخد فيه زي الكريمات السيروم الليزر وعلاج كلي Systemic عن طريق الفم أو حقن بتاخد طريقها ف الجسم وتوصل للمنطقة اللي عايزينها

1 - أساسي Systemic /

حديد ( ferrosonal duodenal ) كبسولة في اليوم بعد الفطار أول 3 شهور زائد ال جاي

*سكة الرخيص / زنك ( Vita zinc ) كبسولة في اليوم + هيرتون ( Hairtone ) كبسولتين في اليوم + حقنة فيتامينات ( Betolvex ) كل أسبوع لمدة شهر بعدين كل أسبوعين لمدة 2 شهر بعدين مرة في الشهر

*سكة الغالي

/ فيتامينات ( Perfectil for skin hair and nails ) كبسولة ف اليوم أو ( phyto ) الاتنين نتايجهم هايلة + أوميجا ٣ ( seven seas) النوع المستورد فيه منه الصغير 120 كبسولة 3 كبسولات ف اليوم بس بطل ينزل تقريبا وفيه منه الكبير تقريبا 60 كبسولة كبسولة في اليوم

2 - أساسي Local للي عندها فراغات أو الشعر بقا خفيف في مناطق معينة /

*سكة الرخيص / Hair back 2% الأحمر النسبة القليله عشان ميطلعلكيش شعر في وشك أو يزودلك شعر باقي الجسم .. صراحة مش بفضله

عشان السبب اللي فات وعشان لازم تكملي عليه 6 شهور اولا وثانيا مينفعش توقفيه مرة واحدة

طريقة استخدامه انك تفرقي شعرك من قدام بالمشط 6 فروقات مثلا وتبخي 6 بخات في كل فرق وتدلكيه كويس أوي وهكذا كل الفروقات وهتستخدميه الصبح وبليل لما يخلصوا ال 6 شهور هتستخدميه بليل لمدة 3 شهور مثلا وبعدين يوم ويوم لمدة 3 شهور كمان بعدين كل 3 ايام بعدين كل اسبوع طريقة اسمها Gradual withdrawal لان لو عملتي ال Sudden ممكن الشعر اللي طلع يقع تاني

*سكة الغالي

/ Revivogen scalp therapy عبارة عن قطارة كده تنقطي بيها عالفروقات استعمليه قبل النوم ولو استعملتيه الصبح متلبسيش بعديه طرحة ع طول لان بيدي لون كده لازم الجلد يتشربه الأول .. ده أفضل ومشاكله أقل من التاني بكتير

3 - أساسي Local للي حابة تستخدم حاجة علي شعرها كله مش فراغات وبس

*سكة الغالي / ( Sorciere ) ده حبيبي

ممكن تجيبيه تبدلي معاه ومع الريفايفوجين واحد الصبح وواحد بليل أو تحطيه علي باقي شعرك مع الهيرباك استخدميه مرة في اليوم هتحطي حبه ع ايدك وبصوابع ايدك التانيه تاخدي وتدلكي بيه فروة شعرك أو الأفضل انك تحطيه في بخاخة وتبخي بيها ع فروة راسك في الفروقات برضه هو ريحته تحفه جدا كانك حاطة برفيوم وبيمتص بسرعه جدا

* سكة الرخيص / هتستعملي بقا سيروم ( Zero Frizz) أو أي سيروم يقوي الشعر أو كريم العناية ( Vividol ) هتكلم عنه في مجموعة العناية للتساقط

4 - مجموعة العناية من شامبو وبلسم و.............

الشامبو / هتبدلي مابين Ecrinal shampoo for women و Vichy والفايدة من انك تبدلي هي معلومة لازم تعرفيها ان شعرك بيتعود علي أي نوع شامبو بتستخدميه بمعني ان بعد فترة مفعول الشامبو مش هيأثر عالشعر زي أول مرة
ومعلومة كمان وانتي بتستخدمي الشامبو لازم تغيري فكرتك عن انه يرغي جامد وترفعي شعرك وجو الإعلانات ده

هو انتي بتستخدمي الشامبو مش عشان يشيل عنكبوت وبيض حيوانات في شعرك أبسولوتلي لا يعني لو حطيتي شوية شامبو عليهم ماية ودلكتي بيهم فروة راسك 5 دقايق كده وتغسليه أقسم بالله هيبقي نضيف

البلسم / لان الشعراية اللي بتتقصف بتقع فالبلسم مهم جدا في موضوع التساقط والتقصف والنشفان فالبتالي انتي هتقسمي شعرك علي جنبين وهتحطي حبة صغنططين في ايدك وهتمشيهم عالأطراف يعني الناس اللي بتحطوا ع فروتها أقسم بالله غلط هيوقعلك شعرك أكتر .. هتستخدمي بلسم foltene بعد كل شامبو

حمام كريم / يعتبر 3 أهمية معانا لو انتي شعرك بيقع جامد أوي وشعرك ناشف أوي من هنا تأتي أهمية حمام الكريم ده بتحطيه ع شعرك كله ومتطوليش عن الفترة اللي مكتوبة في طريقة استخدامه بليز يعني عادة بتبقي 5 دقايق وتغسليه كويس أوي وبيفضل طري برضه اه والله هتستخدمي Nutricerat

الكريم أو السيروم أو الزيت أو واتيفير بتحطي ايه علي شعرك بلاش تحطيه عالفروة الا لو حاجة متأكدة منها زي زيت جدايل مثلا أو زيت الحية أو زيت جوز الهند والأرجان أو كريم Vividol و Ecrinal للتساقط ده جميل جدا وريحته تحفة

والأفضل طبعا لو انتي هتمشي عالحاجات اللي كتبناها من بخاخة الصبح وبليل فبلاش تحطي حاجة علي فروة شعرك غيرهم

طبعا كل العلاجات المذكورة دي طبية يعني من الصيديلة وده الأفضل انك تستخدميه بدل الحاجات التجميلية

شوية نصايح كده عالماشي :::

1 - استخدمي مشط خشب بدل البلاستيك عشان الأيونات وكلام فيزيا وكده
2 - متسرحيش شعرك ع طول وهو مبلول استني شويه لما ينشف لان أضعف حالة للشعر وهو مبلول
3 - حاولي تنوعي في التسريحات بتاعتك يعني شويه ورا شويه جيبيه كله قدام شويه عالجنب كده يعني
4 - متلبسيش الطرحة وهو مبلول متكتمهوش كتير بالطرحة وتكتميه بالكحكة لا سيبيه يتهوي شوية

بس كده خلصنا يارب أكون أفدتكم ولو عجبكم الموضوع متنسوش تعملوا لايك وشير وانضمام لجروب الفيس Dr@smaa Advice_Artistology

أكمل قراءة الموضوع

بدائل المكياج الغالي بجودة ممتازة Best drugstore makeup products

By 5/26/2017

السلام عليكم يا بنات فيديو جديد انهارده عن أحسن المنتجات الرخيصة اللي جودتها تقارن بجودة المنتجات الغالية الفيديو اتكلمت فيه عن كل حاجة تخص الميكاب ..
الفيديو حوالي 20 دقيقة هتطلعي منه بمعلومات حلوة أوي حتي لو بتفهمي ف الميكاب الفيديو بيتكلم عن أفضل ........ دراج ستور

بدائل المكياج الغالي بجودة ممتازة Best drugstore makeup products

1- برايمر
2- فاونديشن تغطية خفيفة لمتوسطة للبشرة الجافة والمختلطة والدهنية
3- فاونديشن تغطية متوسطة لعالية للبشرة الجافة والمختلطة والدهنية
4- كوريكتور كريمي وستيك مصحح لعيوب البشرة
5- كونسيلر
6- باودر مضغوطة وسايبة ( compact و loose )
7- كونتور كريمي وباودر
8- بلاشر
9- هايلايتر
10- مصحح حواجب كريمي وجل وباودر
11- ماسكرا
12- ايلاينر جل وقلم
13- اقلام كحل
14- ايشادو
15- أرواج lipsticks
16- مثبت المكياج
17- فرش الميكاب
18- بديل البيوتي بلندر

كل ده موجود ف الفيديو بشرح مبسط جدا للمنتجات المفضلة يلا بينا نتفرج عالفيديو ومتنسوش تعملوا اشتراك subscribe للقناة
و join لجروب الفيس بوك 👍